अन्न सुरक्षा

आपल्या मूलभूत गरजा कोणत्या? तर अन्न वस्त्र आणि निवारा. अन्न त्यातला प्रमुख घटक. आपली संस्कृतीच मूळात आहे“अन्न हे पूर्णब्रह्म” ह्या संस्कारांची.
मात्र काळाच्या ओघात आपल्या आयुष्यात अनेक बदल झाले, प्रगतीच्या नावाखाली हळूहळू पारंपरिक सवयी बदलत गेल्या, ह्याचा परिणाम आपल्या वेशभूषा आणि आधुनिक विचारांखेरीज खाण्यापिण्याच्या सवयीवरही झाला.जे येणार्‍या काळात मानवजातीला मुळीच परवडणारे नाहीयेत. हयातलाच एक तोटा म्हणजे, तोटा नव्हेच खरंतर ही मोठीच समस्या आहे, ती म्हणजे अन्नाची नासाडी. आपण कचर्‍यात टाकलेले अन्न जेव्हा कचर्‍याच्या ढीगात जाऊन पडते तेव्हा तिथे कुजून त्यातून अनेक हानिकारक वायु बाहेर पडतात आणि मोठ्या प्रमाणावर वातावरण प्रदूषित करतात ज्याचा त्रास आपल्यालाच होतो.

अन्नाची नासाडी भयंकार आहे आणि असे घडायला नकोय, त्यासाठी खालील उपाययोजना आपण करू शकतो:

योग्य खरेदीची यादी :

बरेचदा आपण बाहेर असताना खाण्याचं सामान किंवा भाजी घेतो व नंतर लक्षात येतं की हे आधी फ्रीज मध्ये पडलेल होतं. त्यामुळे सामान तर वाया जातेच वर पैसे सुद्धा जातात. अशावेळी, आपण जेव्हा बाहेर असतो किंवा बाजारात खाण्याच्या सामानाची खरेदी करण्यासाठी बाहेर पडतो त्यावेळी घरात खाण्याच्या पदार्थांची किंवा भाजीची यादी करा म्हणजे उगाच जास्तीचं काही घेतलं जाणार नाही.

आवश्यकतेनुसार स्वयंपाक :

पूर्वी जास्त स्वयंपाक झाला की हातात अन्नपूरना आहे असं म्हणत त्यावेळी घरी येणारे जाणारे असल्यामुळे मग ते जास्त राहिलेले अन्न वाया जात नसे. परंतु आधुनिक काळामुळे उरलेले अन्न वाया जाते. आपल्या रोजच्या जेवणाचा आपल्याला अंदाज असतोच,त्यानुसारच स्वयंपाक करा किंवा बाहेरून ऑर्डर करा जोडीला फळं वगैरे ठेवा म्हणजे चुकून कमी पडल्यास उपाशी न राहता वेळ निभावता येईल आणि काही वायाही जाणार नाही.

खत तयार करा :

तुम्हाला माहिती आहे का, रोजच्या स्वयंपाकातल्या भाज्या निवडताना निघणारी साल आणि देठ, कुजलेली पानं ह्यांचा वापर करून तुम्ही कंपोस्ट तयार करू शकता जे तुमच्या बागेतील झाडांसाठी संजीवनी आहे.

अन्नाची नासाडी टाळा :

लग्नसमारंभात तळलेल्या व इतर खाण्याचे पदार्थ यांचा काही प्रथांच्या नावाने नासधूस करणे आपण सर्वांनी टाळले पाहिजे.